أخبار وطنية

معلومة الأكيد لا تعرفها : من هي المرأة المرسومة في الدينار التونسي ؟

تعرفشي شكون المرأة إلى تصويرتها على الدينار؟

شكون منا ما شدش في يدو دينار والا ما فرحش كي مدولو ” الدينار” مهبة كي كنا صغار. فبحيث الدينار حاجة ياسر مستعملة و حاضرة في حياتنا

اما قداش من واحد منا يعرف شكوني المرأة إلى متصورة على الدينار؟؟ المرأة الموجودة على الدينار ماهياش عليسة والا الكاهنة البربرية اما هي الفنانة التونسية أنيسة لطفي.
باهي ، هات نبداو الحكاية من الاول، بعد الاستقلال كان لازم تونس تصدر العملة متاعها و خرجت الورقة بو دينار و النص دينار و معاهم القطعة المستعملة ليومنا هذا و كانوا أغلبهم فيهم تصويرة بورقيبة و بما انو تونس وقتها حبّت تزيد ترسخ أكثر صورة المرأة التونسية، أصر بورقيبة على انو الورقة و القطعة بدينار تكون فيهم تصويرة مرا و كان وقتها فمة فرقة مسرحية تمشي تقدم العروض متاعها مع التنقلات إلى يعملهم بورقيبة و في الفرقة هذه أنيسة لطفي شدت انتباهه و قال هاذي هي باش تتحط في الدينار


أنيسة لطفي هي ممثلة موش عادية و غرامها بالمسرح و الرقص الكلاسيكي بدا معاها من الصغرة و دخلت عام 1963 لفرقة مدينة تونس مع على بن عياد و خدمت في برشا بلدان كيما سوريا و النمسا و العراق و روسيا و حتى أمريكا. مثلت عام 1966 مع جميل راتب مسرحية عطيل و حتى في السينما خدمت مع برشا اجانب كيما المخرج الطلياني ” دينو ريززي” . وفي التلفزة شفناها ديما المرأة العاقلة و الحنينة في مسلسلاتنا الرمضانية من إلاّ زهرة مرت سي سعيد في قمرة سيدي المحروس و لقيناها زادة في ” يازهرة في خيالي ” وعام2008 في مسلسل صيد الريم مع سي رئيف

انيسة لطفي فنانة متميزة نجمّت تمشي خطوة خطوة في مسيرة حافلة بين المسرح و التلفزة و السينما و هذا الي خلى ايام قرطاج المسرحية السنة في دورتها 19 يكرموها على مشوارها الفني الغني، و تكرم معاها زادة الممثل المصري محمد صبحي و الممثلة سلاف فواخرجي، تكريم لقى برشا تقدير من العند الناس الكل في الوقت الي النقاد يقولو انو انيسة لطفي ماخذاتش حقها كيما ولاد وبنات وقتها.

Photo @Elyes Aouinet JTC 2017
و انحب انذكركم إلى أيام قرطاج المسرحية في دورتها 19 تتواصل لحد نهار السبت 16 ديسمبر و فيها عدد كبير من المسرحيات من العالم الكل و ننصحكم تعملو طلة على حتى تشيخو بالفن الرابع و تعيشو جو المهرجان إلى من عام 1983يجيب مسرحيات من العالم الكل
Par Habib Trabelsi

مقال من موقع femme de tunisie

هذه التعاليق لا تعبر عن توجهات الموقع و إنما تعبر عن رأي صاحبها

Click to comment

Leave a Reply

Votre adresse de messagerie ne sera pas publiée. Les champs obligatoires sont indiqués avec *

 

الأكثر تداولا

To Top

Powered by themekiller.com anime4online.com animextoon.com apk4phone.com tengag.com moviekillers.com