أخبار وطنية

صابر و برّا : مع نقابة المعلّمين… تقرّي نهار تڨرّف إثنين 😉

صابر و برّا : مع نقابة المعلّمين… تقرّي نهار تڨرّف إثنين 😉
_______________________________

بعد يوم من الدراسة، نقابة المعلمين مشكورة أقرّت نهارين إضراب… و بالتالي مع نقابة المعلمين، تقرّي نهار و تڨرّف إثنين… و مع وزارة التعليم، تصحّح الصباح عالإتفاقية، تنساها العشيّة.

فبحيث الولي توا ماعادش فاهم روحو، غدوة ولدو يقرى ولاّ ماددلو طولو في الدّار…
لأنو توا القراية ولات بالرؤية ماعادش بال planning …

حتى قالك جدول التلامذة باش يعودوا يعديوهولنا في النشرة الجوية… بعدلي الأمور ولاّت كل نهار و نهارو… يوليوا يعديوا في النشرة الجوية : غدا إضرابات عابرة على كامل البلاد، و النقابة تمتد من ميلين إلى ستة أميال.

حتّى توا المكاتب باش يولّيوا كالتاكسيات، باش يعلقوا أنبوبة في الباب، كاني خضراء ثما قرايا و كاني حمراء ثما ڨراف… باش هوكة الولي ما يتنبزش كي يجي.

و توا نحن متفاهمين حتما إنو الڨراف حقّ دستوري… أما حتى التعليم زادة حق دستوري لكل مواطن…

قالك نهار الإثنين بعد الڨراف الأساتذة يبداوا قاعدين في قاعة الأساتذة و يبداوا يحكيوا : وين مشيت في الڨراف، تقلها و الله مشيت لتركيا، أما الڨراف الجاي إن شاء الله باش نعمل عمرة.

و هي العلاقة بين الوزارة و نقابة المعلمين و نقابة الأساتذة، تذكرني بهاك اللعبة إلي كنا نلعبوا بيها قبل : الوزارة تبدى ماشية و يحدّفها واحد بالحجر، تتلفت تلقاه نقابة التعليم… تكمل تمشي تاكل حجرة أخرى، تمشي تجري لنقابة المعلمين تطلع نقابة الأساتذة هي إلي ضربتها… تمشي تحكي مع نقابة الأساتذة تصرفقها نقابة المعلمين… هي توخّر و هوما يهربوا الإثنين… هي تمشي و هوما يعاودوا يكرّدوها بالحجر… و الحبل عالجرّارة.

و أنا عندي ولدي قلتلو آش تحب تطلع كي تكبر، قالي نقابي! قتلو و علاش ما تطلعش وزير؟ لا قالي بابا لأنو النقابي يحكم في الوزير.

ماهو قالك ثمّا معلمة نقابيّة و راجلها يخدم في وزارة التعليم، مشاركة عادة هي في الإضراب… أيا شنوّة قالولو صحابو في الوزارة، ويني هيبة الوزارة في الدّار؟ … إي قاللهم النقابة هذيّة الدّولة ما غلبتهاش في 24 ولاية، باش نغلبها أنا في زوز بيوت وصالة.

وربي يحنّن الوزارة على النقابة، و يحنّن النقابة عالتلميذ.

و أنا هاني صابر و برّا!

هذه التعاليق لا تعبر عن توجهات الموقع و إنما تعبر عن رأي صاحبها

Click to comment

Leave a Reply

Votre adresse de messagerie ne sera pas publiée. Les champs obligatoires sont indiqués avec *

 

Most Popular

To Top

Powered by themekiller.com anime4online.com animextoon.com apk4phone.com tengag.com moviekillers.com