أخبار وطنية

صابر و برّا على IFM : حقّقنا نسبة نجاح في الفشل ب 100%!

في مونديال كرة الطائرة باليابان، الفريق الوطني التونسي يلعب ثمانية مباريات و ينهزم فيهم الكلّ… و بالتالي إنجموا نقولوا حققنا نسبة نجاح في الفشل ب 100%… أما عالأقل نجحنا في حاجة، نجحنا إنّا نخسروا المباريات الكلّ دون تعثّر، والمحافظة على الهزيمة لمدّة ثمانية مباريات.
لعبنا ثمانية خسرنا ثمانية … بكل شفافيّة…

فيبدو إنو عندنا إشكال في هذا الفريق، خاصّة إنو رياضة الكرة الطائرة تستحقّ قامات طويلة و نحن عندنا كفاءات وطنية في هذا المجال… ماناش ناقصين قامات طويلة بصراحة!

توا عصام الشابي ما يلعبش في الفريق الوطني للكرة الطائرة!! الراجل تبارك الله أطول من الجدار العازل إلي عملوه مع ليبيا… آه ما شاء الله، عصام الشابي… قالّك ما يحطوهوش تحت الثرية في مجلس الشعب… مالا، قالّك يجيوشي يعملوا تصويت برفع اليد و لاّ حاجة يهزّ يدو يصرفق الثرية متاع المجلس يجيبهالهم فلوس. عيّط لعصام في الفريق…

باهي تقلي إنت عصام عندهم إشكال في الحزب و كذا… بوعلي المباركي ماهوش في ال équipe علاش؟ أطول نقابي في الحوض المتوسطي… بوعلي المباركي الشبكة يعملها بشكير موش لعب…

الحبيب الصيد بلاصتو تعيّط يا بابا يامّي في الفريق… الصيد كي تشوفو وراء الشبكة تقول واقف وراء باب متاع مطهرة…
إنت كي تحطّ الصّيد و عصام و بوعلي القدّام هاو عندك جدار صدّ fer forgé وراء الشّبكة…

باهي هكّة تهنّينا عالدّفاع، في ال attaque ماهو الكرة الطائرة زادة يلزمها واحد ينڨز مليح… باش يشوط… هاو عندنا خالد شوكات، أكثر نائب ينڨز خالد شوكات… لا ما تغرّكش الجهامة، خالد شوكات نڨز مالنهضة جاء في النداء… ما عيطولوش في الحكومة و حركة الولاّة، نقّز جاء مع الدّساترة…عادي غدوة ينقّز تلقاه عند عبد الرّؤوف العيّادي. ينجّم يصفّهم الأحزاب الكلّ في أربعة تنقيزات خالد شوكات… بطل العالم في القفز بالزّانة…

باهي آش عندنا توّا في الفريق : عصام و الصيد و بوعلي في الصدّ… خالد شوكات في الهجوم… باهي، مازاللنا زوز ملاعبيّة… شكون نزيدوا… هو بيناتنا كان نحطّوا عبد العزيز القطّي تو يعبّيلنا زوز بلايص وحدو، هو تبارك الله مليان، أما ماذابينا نبدّلوا الأحزاب…

باهي و نحن كي نحطّوا الحبيب خضر من تالي، تجيشي كورة واطية ماهو يلزمنا شكون هكّة terre à terre ، موش لازم كان الطوال. و حطّ منجي الرّحوي عالشيرة الأخرى، هوكة كي نخسروا و نحبّوا نبلبزو الطّرح عندنا شكون يبلبز، لا يهنّيك المنجي عالبلابز.

فبحيث هانا كوّننا فريق وطني من بني وطني :عصام و بوعلي و الصيد القدّام، شوكات ينقّز، و الحبيب خضر و الرّحوي لتالي…

و هكّة عالأقل السياسيّين يكوّروا في سبيل الوطن، خير ملّي يكوّرو بالوطن. و نحن كشعب هانا ديما نشجّعوا و برّا!

و أنا هاني صابر و برّا.

هذه التعاليق لا تعبر عن توجهات الموقع و إنما تعبر عن رأي صاحبها

Click to comment

Leave a Reply

Votre adresse de messagerie ne sera pas publiée. Les champs obligatoires sont indiqués avec *

 

Most Popular

To Top

Powered by themekiller.com anime4online.com animextoon.com apk4phone.com tengag.com moviekillers.com