أخبار وطنية

تسعة وتلاثين قتيل، القاتل خلطوا عليه مروح، والقرار ؟ توسيم رئيس منطقة الشرطة

في الحكاية الكل معناها ثم كان إقالة مدير قسم الإستعجالي..

بعد 48 ساعة ولا إقالة، ولا إيقاف، ولا إحالة للقضاء.. الكل مريقلين، الناس الكل قامت بواجبها، عادي موت سبعة وتلاثين بعد أشهر من موت أكثر من 20 في باردو.

وصول التعزيزات بعد ساعة، لبلايص المفروض إنها محروسة في وقت العمليات الإرهابية متوقعة.. هذا الكلو عادي معناها.. ما فماش تقصير، لا سياسي، لا إداري، لا أمني.. حتى شيء، السماء الزرقاء.. ما فمة حتى تقصير والناس الكل خدمت خدمتها.. معناها هذا أحسن ما عندكم ؟

لا نسيت حقة، فما غالط و مسؤول.. المرزوقي ووينو البترول..

توة تحاربو الإرهاب هكة، توة تحاربوه أكثر بالبلاتوات..

الإرهابي متحلص على شهادة في العلوم، و انتوما تحاربو فيه بخبراء مستوى السادسة جيم و إلا الخامسة طحين و تزييف..

توة تحاربو الإرهاب.. توة تشبعو نجاحات..

البداية تكون بالبحث عن ناس عندها قدرة على التحليل والفهم وتعرف إش تخرج من أفامها، موش صبيان تسيب في اش بش يقول فمي من إنفعالات وطحين وقال شنوة بش يعلم التوانسة الوطنية وهو متدخل لولدو باش ما يعديش العسكر

البداية تكون بصنع دولة تستحق الإحترام، وذلك سهل بسيط لو تعلمون.. في دولة تستحق الإحترام، لا كمال الجندوبي ولا سعيدة قراش هوما الي يتكلفو بحل جمعية أو حزب بل القضاء

البداية تكون بوقف المهازل..

تسعة وتلاثين قتيل، القاتل خلطوا عليه مروح، تعزيزات توصل بعد ساعة.. والقرار؟ توسيم رئيس منطقة الشرطة

إيه، هكة يخمم الكاراكوز.. كل ما تكون فاشل أكثر، كل ما تاخذ وسام..

بزرع ثقافة الإحتفاء بالفشل، يحب يحارب الإرهاب..

أخيرا، ملاحظة صغيرة..

ياخي السفراء الأجانب، تقلقوا من حملة وينو البترول، لكن موش متقلقين من قتل رعاياهم؟ ما ثماش حتى شوية تقلق هكة؟ حتى ميتين غرام تقلق؟ والا ما يوجعكم كان البترول؟

شاهية طيبة للجميع.

هذه التعاليق لا تعبر عن توجهات الموقع و إنما تعبر عن رأي صاحبها

Click to comment

Leave a Reply

Votre adresse de messagerie ne sera pas publiée. Les champs obligatoires sont indiqués avec *

 

الأكثر تداولا

To Top

Powered by themekiller.com anime4online.com animextoon.com apk4phone.com tengag.com moviekillers.com