أخبار وطنية

الوزارة تستنّى في المعلّمين مالقدّام، جاوهم الأساتذة من تالي

صابر الوسلاتي
.
“نقابة التعليم الثانوي تقرّر تعليق العودة المدرسيّة”… فبحيث الوزارة كانت تستنّى في المعلّمين مالقدّام، جاوهم الأساتذة من تالي!
.
وهو ناجي جلول عندو مدّة ماشي مع المعلّمين والأساتذة بسياسة “أُمشط شَعرك تو نَرجعْلك”… يصحّحلهم عالإتفاقيات، وكي يجيوا يفعّلوا الإتفاقية يقوللهم دُوِّيوُو…
.
والمعلمين والأساتذ هوما زادة عندهم مدّة ماشين مع الوزارة بسياسة “من صفعك على خدّك الأيمن، فَصَرفڨُو بمُشطة”… الوزير يصعّد وهوما يصعّدوا…
.
وهو مستوى التعليم العمومي بالمناسبة، عندو مدّة ملّي إنطلق في مسيرة النَّدْبانْ على سَعدو وسعد إلّي قايمين عليه… لأنّو كي تجي تَخْتبِر تلقى نسبة المَعارف إلّي عند التلميذ التونسي في المستوى الإبتدائي ما تفوتش برشة نسبة المعارف إلي يمتلكها بركوس عايش في جبال وِرغة… التلميذ كان جاب روحو راهو متوسّط أو قريب من المتوسّط، لاهو متميّز لا في حساب ولا في علوم ولا في لغات ولا في سيدي زكري… وحتّى الدّروس الخصوصيّة عاملينها باش ينجّحوا التلميذ وموش باش يعلّموه.
.
أما الواحد آش ينجّم يقول قدّام مُعلّمو، مهما كان نقعدوا قدّام المعلّم ديما تلامذة، وإن شاء الله زادة يقعد المُعلّم في المواقف الصّحيحة، ديما مْعَلِّمْ.
.
لكن بصراحة تعليق العودة المدرسيّة هذا، ماديّا، في صالح الأولياء…
لأنو الوليّ لا يزي خارج متهتّك من مصروف الصيف، وزيد يلقى روحو في مصروف العودة المدرسيّة، وزيد جايو عيد كبير وعلّوش عالأبواب… تخاف لا مِالتّْمَهْمِيشْ يغلط الوليّ يمشي يذبح ولدو ويدخّل العلّوش للمكتب…
.
المهمّ وليكن في علم الجميع، نقابة التعليم الثانوي تقرر “تعليق” العودة المدرسيّة…
.
وهو كي تجي تشوف موش كان التعليم مْعلّق في بلادنا، هي حكومة كاملة مْعلّقة توّا عندها مدّة لا تْبِلّ لا تْعِلّ، حتّى إلّي يجي يِعلّق عليها تخلّيه مْعلّق، وإلّي يهزّلها في المْعالِق تعلّقلو وسام… وقعدنا نحن، الشعب العالق، معلّقين آمالنا في كمشة مْعالق، كلّ مِعلاق أتعس من خوه، في إنتظار إنو هاك المْعالق المصدّدة يعلّقوا الصباط عن قريب، ثمّاش ما إدّور هالعجلة العالقة في الميلوسي.
.
ولكم سديد النّظر!

هذه التعاليق لا تعبر عن توجهات الموقع و إنما تعبر عن رأي صاحبها

Click to comment

Leave a Reply

Votre adresse de messagerie ne sera pas publiée. Les champs obligatoires sont indiqués avec *

 

Most Popular

To Top

Powered by themekiller.com anime4online.com animextoon.com apk4phone.com tengag.com moviekillers.com